اللحوم . دااااااااايت !!!!!....

اللحوم
1 العصاج
نحمر 5 بصلات لكل كجم من اللحم الاحمر فى ملعقه واحده زيت و نضيف لها اللحم المفروم و نتبلها ب فلفل اسود و قرفه و بهار و حبهان بودره و ممكن جراما سالا هندى و لا نضع هنا حبهان و فى النهايه بعد تسويه اللحم نضع الملح

2 اللحم المشوى
نتبل شرائح اللحم بالملح و الفلفل و عصير البصل و تشوى

ملحوظه هامه لاعطاءاللحوم مذاق المشوى بعد شواء اللحم عادى نضعه فى حله لها غطاء محكم و نحضر قطعه من ورق الالومنيوم و نشكلها على شكل مقعر كوب يعنى نضع فيها فحمه مشتعله و نثبتها فوق اللحم ثم نضع عليها ملعقه صغيره من السمن و بسرعه نغطى الحله حتى تتشرب اللحمه طعم دخان الشواء

3 اللحم الروستو
قطعه اللحم الروستو بتبقى قطعه لحم هبره كبيره على بعض غير مقطعه
ندخل فيها نصل السكين فى مواضع متفرقهو ندخل فى الشقوق خليط التوابل المكون من ملح و فلفل و ثوم و بهار و رشه قرفه و شويه زعتر لو بتحبوه و نضعها فى ورق الالومنيوم مع فلفل اخضر و طماطم و بصل و كرفس و لمون و ممكن نضيف خضار مثل البسله و جزر و كوسه و نغلق الفويل باحكام و نضعها فى الفرن و نضيف كوب من الماء خارج الفويل فى الصينيه لضمان تسويه اللحم

4 اللحم المسلوق
نغلى مقدار من الما و نضع بصله مقطعه و فلفل اسود و بعض فصوص الحبهان(الهيل) و ورق الغار (ورق اللورى) و فص مستكه بعد غليان الماء نضع البصل و اللحم و قبل ان نضع التوابل نشيل الرواسب التى تظهر على السطح ثم نتبل بدون ملح و بعد التسويه نضع الملح فى النهايه
للحصول على شوربه لايت نضع الشوربه فى التلاجه لتانى يوم حتى يتكون طبقه من الدسم اللى ممكن نشيلها بسهوله
5 اللحم بالتربيه (الصوص الابيض باليمون و الصوص البنى بالمشروم)
نحضر مقدار من اللحم المسلوق مع الشوربه
نحمص ملعقتان من الدقيق و نضع عليها مقدار من الحليب خالى الدسم و الشوربه اللايت و نضعها فوق اللحم
الصوص الابيض
لا نحمص الدقيق فتره طويله و قبل ان نضيفه للحم نضع بشر لمونه و بعض قطرات من عصير اللمون و لا نضعها على النار مره اخرى
الصوص البنى
نحمص الدقيق فتره اطول ليتغير لونه للبنى و نضيف المشروم قبل اضافته على اللحم
6 اللحم المحمر(كباب حله)
ندهن صينيه تيفال بطبقه رقيقه من السمن و نضع اللحم بعد ما نسخنها علشان اللحم يكتسب قشره و ريحه اللحم المحمر نضع عليه كميه كبيره من البصل المقطع و نتبله بالفلفل الاسود و البهارو بعد ان يتحمر اللحم مع البصل ممكن نضيف مقدار من الماء حتى تتم تسويه اللحم و بعد التسويه نضع الملح

7 اللحم المحمر الثوم
نفس طريقه الكباب حله و لكن بدل البصل ثوم

8اللحم بالصلصه (كمونيه اورمه)
نضع بضع قطرات من السمن فى مقلاه تيفال و نحمر فيها الثوم و نضيف اللحم على نار هادئه و نتبلها بالفلفل و البهارو قبل تمام النضج نضع عصير الطماطم حتى تتم النضج مع ملاحظه ان النار هادئه دائما ثم نضع الملح و فى النهايه بعد تسبيك الطماطم جدا نضع ملعقتين من الخل

9 اليخنى (عاده يقدم مع الكسكسى)
نحضر كميه كبيره من البصل الصغير الحجم او بصل مقطع جوانح نضعه مع اللحم على النار فى مقلاه تيفال مدهونه سمن و سخنه و نتبل اللحم بفلفل و زعتر و شويه كمون و بعد النضج نضع الملح و عصير الطماطم و نسبك الطماطم و نطفى النار

نلاحظ عدم تتبيل الكبده فبل التسويه علشان ما تنزلش سوائلها و تزفر و النار تكون دائما عاليه
10 كبده مشويه
نشوى الكبده بدون تتبيل و هى على النار نضع عليها ملح و فلفل و و كمون و شطه على كل جانب و بعد ما نرفعها من على النار نضع اللمون و الفحم اللى فى الفويل

11 كبده اسكندرانى
نضع ملعقه من الزيت النباتى و نحميها قوى و نضع الكبده على نار عاليه و نقلب حتى تنضج ثم نتبلها بملح و فلفل و كمون كميه كويسه ونفرم ثوم مع فلفل اخضر كميه كبيره يعنى كل كجم كبده احط له راس كبيره ثوم و عدد 4 فلفل اخضر كبير و اقلب مع الكبده و لما السوائل تنشف ارفعها من على النار و اضع الليمون

12 الكفته المشويه
كجم لحم مفرومنضع عليه 2 بصله مبشوره ناعم+2 ملعقه كبيره سبايسى حار+ملعقه كبيره بقسماط مطحون+حزمه بقدونس+ملح و فلفل و 2 فص ثوم مفروم و زعتر و بهار و تشكل و تشوى و لا ننسى فى النهايه نضع لها الفحم فى ورق الفويل

13 الكفته البانيه

نفس طريقه الكفته المشويه و قبل التسويه نضعها فى الدقيق و البيض و السبايسى و نضعها على الشبكه فى الفرن


14 الهامبورجر
كجم لحم مفروم نضع عليه كل اللى حطيناه مع الكفته+3 فص ثوم زياده مفرومين مع الفلفل الاخضر+2 بيضه و يشكل مثل الهامبورجر و يشوى

15الحواوشى
زى الهامبورجر بس بدون بيض و نضع عليه كجم طماطم و ربع كجم فلفل اخضر و يقسم و نشكله على هيئه قرص فى حجم رغيف العيش العربى و نسويه فى طاسه تيفال و نحشى بيه العيش بعد ما يستوى
ممكن نشكله اقراص صغيره على قد العيش السن او البر

16البيض الاسكتلندى
لكل نص كجم من اللحم المفروم بصله مفروم ناعم جدا و بيضه و توابل الكفته و بعد ما نخلط المقادير نسلق 4 بيضات و نغلفها باللحم و ندخلها الفرن حتى تنضج

17القلب
نضع ملعقه كبيره من الزيت النباتى فى مقلاه تيفال و نحميه قوى ثم نضع القلب المقطع و نقلبه و نتبله بفلفل و بهارو لما يتحمر لونه نضع كوب من الماء كل ده و النار عاليه و لما يستوى القلب نتبله ب الملح
طريقه القلب العادى نزيد الزيت و نحمر فيه القلب بدون الماء و لكن الطريقه الدايت الزيت قليل و الماء علشان القلب يستوى بس الطعم واحد و بعمله كده علطول

18 كفته داوود باشا
نتبل اللحم المفروم بتوابل الكفته بدون السبايسى و الثوم و تشكل على هيئه كرات صغيره
نحمر 3 بصلات فى رشه سمن و نضيف لها عصير الطماطم و تسبك ثم تخفف بالماء و نضع فيها اللحم و تسوى و لا تقلب حتى لا يتفتت اللحم و لا تتبل لانها تكتسب توابل اللحم يمكن اضافه الملح و الفلفل لو احتاجت

19 اللحم محشى خضار
نفس طريقه البيض الاسكتلندى لكن بدل الحشو بالبيض المسلوق نضع خضار مسلوق مثل البسله و الجزر

20 شاورما اللحم (الاحسن ضانى صافى)
نضع قطع اللحم فى صينيه مدهونه برشه سمن للريحه فقط ثم البصل و الطماطم المقشره و الفلفل الاخضر و نتبلها بفلفل و قرفه كتير و حبهان مطحون و كل شويه نزيد ماء حتى تمام النضج ثم نضع الملح

21فاهيتا اللحم
قطع اللحم نضع عليها زعتر و خل و بردقوش ان وجد و قطعه جبن ابيض ملح خفيف و صويا صوص و بابريكا (فلفل قرنقوطى) و كمون و نضعها و بصل و 4 فصوص ثوم على النار و نزيد الماء و لما تستوى نحمر فلفل اخضر فى ملعقه صغيره زيت زتون و نحطها على اللحم على النار لمده 5 دقائق عل فكره حلوه قوى
22 لحم بالكارى
نضع اللحم مع البصل و الفلفل الاخضر و الطماطم و نتبلها بالكركم و الكارى و الكمون و الملح و الفلفل و السمسم لو بتحبوه و الجنزبيل و القرفه و البهار و كل ده على النار مع ملاحظه ان الملح فى الاخر

بالهنا و الشفا